Dalc’h miz Kerzu 2022 war sturiadurioù ar budjed e berr gomzoù

E-pad an dalc’h eus ar 15 hag ar 16 a viz Kerzu ez eo bet degemeret gant 83 dilennad.ez ar Rannvro sturiadurioù bras ar budjed 2023, a vo breutaet ha votet e miz C’hwevrer.

Sturiadurioù ar budjed evit 2023

Ar c’huzul-rannvro en deus degemeret sturiadurioù ar budjed 2023 a zeu, eil budjed ar respetad 2021-2028 : ar sturiadurioù-se a gemero korf en oberoù fetis ar budjed 2023 a vo votet e miz C’hwevrer. E-tal ur blegenn evel biskoazh a-fet an arc’hant, abalamour da gresk ar prizioù ha da gresk trumm priz an energiezh he deus adkadarnaet Rannvro Breizh he c’hoant da sikour ar Bretonezed hag ar Vretoned o terc’hel gant ar strivoù evit bastañ d’o ezhommoù ha d’ar pezh emaint o c’hortoz, hep digreskiñ an emell publik, ar pezh a c’hallfe gwashaat ar riskl enkil. Kement-se en ur soñjal dalc’hmat er moder hag en treuzkemmoù e-kreiz an eskemmoù.

Rak-se e tremen kendalc’h ar c’hinnig servijoù publik da gentañ, da skouer :

• Evit a sell ouzh ar vuhez el liseoù, ar stummañ micherel hag ar fiñvusted, gras d’ur c’hinnig kempouez a-fet ar stummadurioù hag an implijoù, o reiñs lañs da skouer d’un ekonomiezh eus ar wellentez vor, gant ekoreizhiadoù a-feson en aod.
• O santualaat ar budjedoù sevenadur, sportoù ha yezhoù e Breizh, domanioù pouezus ken-ha-ken hag a warant kenstagded Breizh hag ar bevañ asambles.
• O wareziñ an tri ahel bras : “Bevañ mat e pep lec’h e Breizh” evit buanaat an treuzkemmoù a denn d’an ekologiezh, d’an energiezh ha d’an hin, “Muioc’h a implijoù ha nebeutoc’h a garbon” diazezet war un ekonomiezh a ziorro an obererezhioù evit an amzer da zont (debriñ mat, sibersurentez peotramant ekonomiezh ar mor) ha “Muioc’h a Vreizh ” da lavaret eo kadarnaat un identelezh hag ur patrom breizhat diazezet, e-mesk traoù all, war ar c’hemer perzh, ar c’hengred hag an digonad stroll e servij ur gwel boutin gouest da lakaat an nerzhioù bev war-sav.

An treuzkemmoù e-kreiz an dalc’h :

• Ar steuñv heol rannvroel, a c’haller gantañ diorren ur gwir filierenn vreizhat, a grou implijoù hag a gresk an emrenerezh energetek.
• An distro war prantad kentañ ar steuñv belo a-raok ma vo echuet e 2024, a zoug diazezoù aozadur ur “reizhiad velo” e par ar rannvro.
• Ar sturiadurioù evit politikerezh-mor Rannvro Breizh, en ur blegenn m’eo kreñv ar redioù (hin, gwask ar font, koust an energiezh, ha kement zo).

Ha daou deuliad bras

Al labour-douar gant ar strategiezh rannvroel evit staliañ – treuzkas ar feurmoù :

Evit gwarantiñ emrenerezh Frañs a-fet ar boued e fell da Rannvro Breizh e vefe staliet 1000 feurm ar bloaz ha gallout evel-se saveteiñ gwiad Breizh al labour-douar. Evit kement-se, 4 ober bras :

• Gwellaat treuzkas ar feurmoù e Breizh. Ul labourer-douar hag en deus treuzkaset e feurm a dalvez en deus graet berzh.
• Sikour ar raktresoù staliañ ;
• Gwareziñ, durc’haat implij ar font labour-douar ; da lavaret eo implij an douaroù.
• Sachañ tud ha stummañ anezho ouzh micherioù al labour-douar ; kalz anezho zo anavezet fall !

Ar Sevenadur gant follenn-hent nevez ar respetad « Eus ar C’hultur d’ar permakultur » :

Stag start eo Rannvro Breizh ouzh ekoreizhiad sevenadurel Breizh en he liesseurted, ha fellout a ra dezhi kenderc’hel da skoazellañ ha souten ar re a ra dezhi bevañ bemdez.

Ar stignadoù o deus diskouezet e oant efedus zo astalvoudekaet hag azasaet ouzh an dalc’hoù a vremañ evit ma vo stabilaet ha kendalc’het ar politikerezhioù sevenadurel kent, gwarezet ar vuhezegezh arzel ha dibarded ar vuhez sevenadurel e pep lec’h e Breizh.

Bez’ ez eus 38 diviz er follenn-hent-mañ, rannet e teir lodenn vras :

• Souten gennad an arz : kennerzhañ frammadur ha stummadur ar gennad hag ambroug anezhañ war-zu an treuzkemm hollek,
• An deskadurezh arzel ha sevenadurel evel doareoù bleuniadur ha digaezhadur,
• Mont a-du gant al luskoù sevenadurel asambles gant an annezidi, reiñ lañs d’ar glad dizanvezel, ober diouzh ma tiorroio ar pleustr gant amatourien.