Dalc’h miz Kerzu 2023 war heñchadurioù ar budjed e berr gomzoù

Unan eus al labourioù d’ober kentañ-wellañ gant ar Rannvro a sell ouzh amzer da zont al labour-douar e Breizh. Evit suraat an traoù eo ret skoazellañ al labourerien-douar yaouank d’en em staliañ. Fellout a ra d’ar Rannvro lakaat staliañ 1 000 anezho ar bloaz a-benn 2028. Evit ober kemend-all e vo lakaet al liseoù-douar da vezañ dedennusoc’h abalamour da sachañ tud nevez war-zu ar micherioù-se.

 

 

 

En desped da bolitikerezhioù yezhel youlek e tigresk an niver a vrezhonegerien hag a c’hallaouegerien bepred. Evit klask terriñ al lusk fall-se e vo lakaet e pleustr steuñv ar Rannvro evit adperc’hennañ ar yezhoù, unan seurt n’eo bet biskoazh, abalamour da dreuzkas ar yezhoù dre ar c’helenn hag ar stummañ, ha da wellaat o flas er vuhez pemdez. Fellout a ra d’ar Rannvro postañ tost da 13 M€ e 2027 (da lavaret eo 3,6 M€ ouzhpenn e-skoaz 2023).

Evit a sell ouzh treuzkas ar brezhoneg ez eus termenet 23 ober abalamour da stummañ muioc’h a zeskidi ha tud deuet. Evit a sell ouzh ar gallaoueg e fell d’ar Rannvro e vefe lakaet ar re yaouankañ d’ober anaoudegezh gant diazezoù ar yezh, evit gallout kontañ 3000 skoliad o teskiñ gallaoueg er 1añ derez e 2027, pa’z int 1 250 hiziv an deiz.

 

Hiziv e Breizh ne glot ket ken ar c’hinnig gant c’hoantoù nag ezhommoù an dud pe re ar vro. Tenn eo saviad al lojeiz hag abalamour da se e rank kalz familhoù mont da vevañ pell diouzh o lec’h labour, ar pezh a laka kresk bras war an ezhommoù monedone, pe mod-all int rediet d’en em staliañ e tiez marc’hadmatoc’h, hag izeloc’h o c’halite peurliesañ.

Un dalc’h meur eo enkadenn al lojeiz hag ar Rannvro a fell dezhi tapout krog ennañ. Kemer a ray perzh en ur respont stroll peogwir eo ret ijinañ un doare reolenniñ publik nevez abalamour da aesaat d’an dud kavout lojeiz e Breizh.

Evit ober kement-se e fell d’ar Rannvro lakaat ur politikerezh e pleustr war al lojeiz hag an annezañ aozet tro-dro da 4 ahel :

– Luskañ ha kas ur politikerezh rannvroel war-raok gouestlet d’al lojeiz “giz Breizh” ;

– Aesaat gwerzhañ tachennoù publik zo abalamour da ginnig lojeiz nevez kuit a artifisielaat takadoù nevez ;

– Lakaat arc’hant evit skoazellañ politikerezhioù tiriadel an annezañ hag an obererien war dachenn al lojeiz ;

– Kreñvaat chadenn broduiñ al lojeiz ha kas an treuzkemmoù war-raok war an dachenn-se.

Da-heul al lezenn nevez “evit an implij leun” e fell d’ar Rannvro, d’ar Stad, da Bol Implij ha da Departamant Aodoù-an-Arvor aozañ un taol-arnod e bed ar stummañ hag ar c’henurzhiañ e Breizh. Ar pezh a fell deomp ober eo sevel ur rouedad (en Aodoù-an-Arvor) evit an dud vreskañ, evit :

• kinnig hentoù stummañ hag a glot gwelloc’h c’hoazh gant ezhommoù ar glaskerien-labour ha gant ar pezh a vez gortozet gant an embregerezhioù ;
• aesaat labour tuta an embregerezhioù gant ur c’hinnig servijoù aesoc’h ober gantañ.

 

5 milion a wez ouzhpenn etre 2024 ha 2028 : ur bazenn nevez tremenet eo evit ar Rannvro hag he Steuñv breton evit ar gwez, a oa bet lañset da gentañ evit plantañ 5 milion a wez a-benn 2025. Ouzhpenn da se e talc’ho ar Rannvro da labourat e-stern ar Steuñv Koad Energiezh Breizh ha postañ a ray arc’hant evit skoazellañ an danvez « koad energiezh » hag aozañ ar rouedadoù pourveziñ lec’hel, abalamour da greskiñ al lodenn eus an energiezh a vez produet gant koad.

En holl eo tost da 31 M€ a vo postet er Steuñv breton evit ar gwez, evit an holl bolitikerezhioù publik, en o zouez Breizh Forêt Bois, Breizh Bocage, ar programmoù enklask, buheziñ ha frammañ ar filierenn, ar skoazelloù evit staliañ kaoterioù, bezañ lodek e kevredadoù publik lec’hel….