Ur savenn d’ar broduerien ha d’ar vevezerien da dostaat an eil re ouzh ar re all

Er stad m’emañ an traoù hiziv an deiz e fell d’ar Rannvro sikour ar broduerien hag ar vevezerien en o buhez pemdez. Se zo kaoz he deus lakaet ur savenn eskemmoù enlinenn evit ar broduerien hag ar vevezerien eus Breizh. Ar pal eo mont diouzh ezhommoù an holl obererien war dachenn an « debriñ mat » (al labourerien-douar, an dud a labour e bed ar mor hag artizaned ar boued) a zo lakaet diaes gant ar c’houlzad kraouiañ, ha war ar memes tro kelaouiñ an dud war ar produioù eus ar vro hag ar mare a c’hallont kavout nepell diouzh o zi.

Ur galv d’ar broduerien eus Breizh : pedet oc’h da lakaat hoc’h anv enlinenn e-barzh www.produits-locaux.bzh, a zo ur savenn foran hag a genskoazell. En ur ober un toullad munutennoù e c’hallit mont e-barzh ho kont ha lavaret hiroc’h war ar produioù a fell deoc’h gwerzhañ dre Internet : frouezh ha legumaj, evajoù, bara ha gwestell, produioù eus ar mor pe eus dour-dous, kig, boued- laezh, mel…

Digor eo ar savenn abaoe ar Yaou 9 a viz Ebrel d’ar vevezerien ha d’ar stalioù nes bihan a werzh boued. Enni e kaver ur gartenn eus an holl broduerien, d’an dud da gavout ha da lec’hiañ ar re dostañ ouzh o zi. Gant ar savenn e vo gouezet hiroc’h diwar-benn ar produioù a c’haller kavout, koulz re an douar ha re ar mor, hag ivez pelec’h, peseurt devezhioù ha da bet eur, penaos e vezont tapet : kaset da di an dud pe da dapout en ur stal nes, un drive, pe mont da gerc’hat anezho betek ar feurm, kement-se diouzh ar reolennoù yec’hed ha diouzh an disklêriadur pesketa evit ar produioù tennet eus ar mor.

Savennoù all hag a ya en-dro bepred

Ne zeu ket ar benveg kenskoazell-mañ da gemer plas ar savennoù douarlec’hiet all a zo anezho dija pe emeur o sevel, meret gant an dud a labour er filierennoù pe gant rouedadoù, na plas al lec’hiennoù evit gwerzhañ enlinenn. Gant ar savenn web-mañ nevez-savet e kinniger klokaat ar pezh a sell ouzh lakaat an dud e darempred an eil re gant ar re all ha kinnig servijoù, ar pezh a c’hallo degas liammoù en amzer-da-zont war-zu savennoù lec’hel pe gennadel hag a zo anezho dija. Dav eo gouzout n’eus ket a eskemmoù arc’hant enni.

Ul labour a-stroll

Krouet eo bet ar savenn genskoazell-mañ gant Rannvro Breizh gant sikour ar gevredigezh .bzh, hag asambles gant he c’hevelerien reoliek eus ar filierennoù produiñ (Kambroù labour-douar, Kambr rannvroel ar micherioù hag an artizanerezh, KKI Breizh, Breizhmer, Produet e Breizh, Labourerien-douar Breizh, FRAB – labour-douar bio -, ar rouedad CIVAM, Intrudu Bio Breizh…) a vroud o izili da vont war hor savenn eskemmoù.