Enskrivet eo bet meurvein Karnag ha meurvein aodoù ar Mor-Bihan war roll glad ar bed gant an UNESCO !War-zu an UNESCO evit meurvein Karnag hag aodoù ar Mor-Bihan !

17 June 2025

3 minutes de lecture

Ofisiel eo : diwar vremañ emañ Meurvein Karnag ha Meurvein aodoù ar Mor-Bihan war roll ar glad bedel gant an UNESCO. Ar Mad-se, bet douget gant un engouestl a-stroll war an tiriad, ac’h a d’ober ar 54vet lec’hienn bet renablet e Frañs.

D’an 12 a viz Gouere 2025 e oa bet enskrivet ent ofisiel meurvein Karnag ha re aodoù ar Mor-Bihan war roll glad ar bed gant an UNESCO. Un enor bras eo evit an hollad monumantoù dreistordinal-se eus an Neolitik, anezho testoù dibar eus istor an dud hag eus pinvidigezh an arkeologiezh e Breizh. Bezañ degemeret war renabl glad ar bed a greñvay an oberoù fetis a vez graet evit gwareziñ, reiñ da anavezout ha lakaat war-wel glad ar meurvein.

Ur glad dibar hag hollvedel

Ouzhpenn ul lec’hienn arkeologel zo er Mor-Bihan : muioc’h evit 550 lec’hienn veurveinek zo bet anavezet en un tregont kumun bennak. Steudadoù mein-hir, mogerioù-tro, taolioù-maen, karnioù, krugelloù… Gant ar savadurioù bras-se e c’haller gouzout hiroc’h war an dud a veve eno 5000 bloaz a-raok J.K., hag anavezout gwelloc’h o c’hevredigezh hag o lidoù.

Ur raktres skoazellet gant Rannvro Breizh

Anavezet eo ar Mor-Bihan evel unan eus an takadoù meurveinek pouezusañ en Europa, hag er bed-holl zoken. E lec’h all ebet ne gaver meurvein ken stank evel er Mor-Bihan, mat-tre int enframmet en dremmvro naturel e Breizh, ha dizoloet ez eus bet traezoù arkeologel ral enno : sed aze abegoù a bep seurt evit bezañ enskrivet war renabl an UNESCO.

Ar meurvein e Karnag hag en aodoù ar Mor-Bihan a ya d’ober un hollad meurveinek eus ar re dalvoudusañ er bed. Dibar eo an hollad-se abalamour da :

Niver ha liesseurted ar monumantoù : ouzhpenn 550 lec’hienn renablet e 28 kumun,
Puilhded ar pezhioù-annez kavet gant an arkeologourien, ar pezh a ziskouez pegen bras e oa talvoudegezh sevenadurel hag ekonomikel al lec’hiennoù-se da vare an Neolitik,
Enframmet brav eo en ardremez an arvor,
Un niver bras a beulvanoù war un takad bihan a-walc’h, un dra hep par er bed a-bezh,
Bezioù stank-ha-stank,
Engravadurioù dreistordinal, stank ha liesseurt.

Ur raktres skoazellet gant Rannvro Breizh

A-dreñv an taol–kaer-se emañ labour ar gevredigezh « Maeziadoù Meurvein ». E-pad ouzhpenn 10 bloaz he deus roet bec’h asambles gant kalz kevelerien : ar c’humunioù, an etrekumunelezhioù, Departamant ar Mor-Bihan, ar Stad, ar c’hevredigezhioù… Gant Rannvro Breizh eo bet harpet ar goulenn enskrivañ-mañ, abalamour ma fell dezhi gwareziñ ha lakaat ar glad dibar-se war-wel. Bezañ anavezet gant an UNESCO a sikour ivez brudañ pinvidigezh sevenadurel hag istorel Breizh ha lakaat anezhi da skediñ en estrenvro.