Dalc’h an 18 ha 19 a viz Ebrel berr-ha-berr
7 Mae 2024
6 vunut evit lenn
Buhez ar studierien, fiñvusted etrebroadel ar re yaouank, steuñv stourm ouzh ar vreskted, energiezhioù mor nevezadus… An dibaboù talvoudusañ ha videoioù ar c’hendivizoù a c’hallit kavout war bretagne.bzh
An Arzh : un dileuriadur servij publik nevez
Abaoe 2007 e reomp war-dro al linennoù mor a gas betek Groe, ar Gerveur, Houad, Edig, an Arzh, Enez-Vriad, Baz, Eusa, Molenez ha Sun. Ar bloaz-mañ e vo nevesaet an dileuriadur servij publik evit an Arzh abalamour ma vo echu a-benn fin miz Eost. Lañset eo bet an argerzh adneveziñ gant an dalc’h-mañ, ha war sell emaomp da lakaat ul lestr dre hidrogen e servij e 2026. An Arzh a c’hallfe bezañ al lec’h kentañ ma vo kaset an dud gant ul lestr dre hidrogen.
Ar servij publik gwarantet en un nebeud sifroù :
- tost da 341 000 a dud treuzdouget e 2022
- 10 mont-ha-dont bemdez etre miz Gwengolo ha miz Mezheven (16 e miz Gouere ha miz Eost)
- 4 351 a droiadoù graet e 2022, da lavaret eo ouzhpenn 8 700 treizhadenn
Fiñvusted ar Vretoned yaouank dre ar bed
A-holl-viskoazh eo bet fiñvusted etrebroadel al liseidi hag ar studierien vreton un dra a bouez bras evidomp, kement-se zo kaoz e lakaomp hor stignadoù ambroug da vont diouzh an ezhommoù. Soñjet int bet da gentañ evit ar raktresoù aozet gant hor rannvroioù keveler (Skos, Kembre, Kerne-Veur, Iwerzhon, Asturiez, Galiza, Wielkopolska ha Japan) hag ar re all ivez. E-sell emaomp da reiñ sikourioù arc’hant d’ar re yaouank en dienez ivez. Da lavaret eo :
- krouiñ ur stignad fiñvusted a-stroll evit al liseidi, hag a gemero plas al lodenn “digoradur war ar bed” er raktresoù desavadurel Karta ;
- ur skoazell builhoc’h evit ar rannvroioù hag ar broioù priorek, evit ar fiñvusted a-stroll koulz hag ar raktresoù hiniennel ;
- lakaat ar re yaouank dibourvesañ, liseidi pe studierien, da dremen da gentañ ;
- krouiñ ur skoazell arc’hant evit klask kevelerien war an takadoù priorek ;
- ur sikour teknikel gant ar Rannvro evit ar raktresoù Erasmus+, evit al liseoù dreist-holl.
Reiñ bec’h evit yaouankiz Breizh
Vidéo Lutte contre la précarité étudiante
Sikour ar 150 000 studier a zo o chom e Breizh, evit al lojeiz, ar boued, an treuzdougen, ar yec’hed… Sed ar pezh a fell deomp ober. En tu all d’ar sikour a roomp d’ar skolioù-meur ha d’ar skolioù bras e fell deomp kemer perzh e buhez ar studierien evit sikour ar re 18-25 bloaz da vevañ mat o bloavezhioù studioù uhel e Breizh. War ar memes tro e fell deomp reiñ lañs da raktresoù ar re yaouank ha talvoudekaat o labourioù a-youl-vat evit harpañ o engouestloù. En un doare fetis :
- Pevar raktres learning centers (levraouegoù 2.0) e Roazhon, Sant-Brieg ha Sant-Maloù,
- Staliañ ur rouedad rannvroel a ispiserezhioù studierien, e liamm gant ar rouedadoù skoazell evit ar boued,
- Arc’hantaouiñ al Lec’hioù Degemer ha Selaou ar Yaouankiz (PAEJ),
- Ur skoazell kreñvaet evit ar studierien e stummadur yec’hedel ha sokial,
- Prizioù digresket, ha digoust e-pad an hañv, war ar rouedad BreizhGo, ha studiañ penaos kinnig ur c’houmanant diharz evit an dud yaouank dindan 26 vloaz, da arnodiñ e 2025,
- Lakaat ur stignad nevez e plas evit skoazellañ ar raktresoù douget gant kevredigezhioù studierien ha soñjet evit ar re yaouank e Breizh, hag a sell ouzh ar genskoazell hag an endro.
Steuñv stourm ouzh ar vreskted
Bloaz zo e oa bet degemeret ar steuñv nac’h an dienez hag ar vreskted, e-kerzh dalc’h ar 7 a viz Ebrel 2023, ha kalz oberoù a vez graet drezañ e Breizh dija. Peseurt oberoù a zo bet lakaet e pleustr en ur ober ur bloaz ha petra eo ar bilañs ?
- skoazelloù arc’hant a vez kinniget evit sikour tremen an aotre-bleinañ (1 500€ roet d’ar skolioù-bleinañ), evit ar re yaouank etre 18 ha 30 vloaz hag enskrivet e stummadurioù micherel arc’hantaouet gant ar Rannvro.
- sikouret e vez staliañ savennoù skoazell d’ar fiñvusted evit ar re yaouank dibilh, e meur a lec’h e Breizh.
- kirri zo bet profet da 8 savenn skoazell d’ar fiñvusted,
- harpet e vez ar rouedadoù skoazell pennañ evit ar boued,
- broudet e vez al liseoù da brofañ ar bouedoù na vezont ket implijet er c’hantinoù,
- harpet e vez ar stignad “Cultur’Actions solidaires” evit kinnig arvestoù, annezioù arzourien ha pleustroù arzel all d’an dud a zo o chom pell diouzh ar bed-se,
- lakaet ar pass klas mor da dalvezout
E 2024 ha 2025 e talc’himp gant an oberoù-se.
EMN : kemer perzh er steuñviñ broadel evit ar parkoù rodoù-avel war neuñv da zont
Embannet hon eus ar pezh a fell deomp ober da-geñver ar raktres evit staliañ parkoù rodoù-avel nevez er mor ha da-heul ar c’hinnig graet gant ar Stad, e miz Meurzh, diwar-benn ar gartenn dopografek kentañ eus an takadoù mat evit staliañ anezho. Diouzh un tu e fell deomp delc’her kont er memes mod eus an aveldredan er mor, ar pesketa micherel hag ar vevliesseurted, ha diouzh un tu all, hag a-raok pep tra, lakaat degemer ar parkoù-se gant an holl evit reiñ lañs d’an ekonomiezh e Breizh a-bezh.
Evit mont pelloc’h
Rannañ :
