Diq’ao 15 de novembr 2026, pernéz part a la consulte publliqe pour forci la democracie rejionale en Bertègn
1 October 2026
3 minutes de lecture
“Coment qe je pouons forci nôtr democracie, mieûs decider e fere de cai pour l’aviendr de la Bertègn » ? Diq’ao 15 de novembr, les Bertones e les Bertons sont periës a repondr a la qhession-la, a dire lous seqence e a perpozer de cai su l’emplla internet bretagne.bzh/votre-opinion.
Eune consulte ? Pourqhi don ?
Passaije ecolojiqe, revoûsserie limériqe, parchanjeries demografiqes, le monde a se defier de pus en pus des instiqhucions…. des defis, la Bertègn n-n a bel e ben a se chevi, defis qi nous coje a runjer d’assembl su nôtr aviendr.
Pour repondr a la, la Rejion vieût ouvraijer o les Bertones e les Bertons en les mettant a dire lous rezon, a sour fin d’enjiner d’o yeûs coment terouer des amarées concretes, su le long du temp e qi jouent pour nôs terroueres coment q’i sont.
De cai qe je velons : rasserrer le pus fôt d’aviz, d’espair e de perpozeries q’i se peut a sour fin de remettr su la forje la rouellance de la democracie rejionale e forci la meniere qe chaqhun e chaqhune a de porter son brocheton a la fromiere de la rejion.
Coment prindr part a la consulte-la ?
Pour partaijer vôs aviz e perpozeries, v’éz qe d’aler su le chafaod www.bretagne.bzh/votre-opinion, menë par make.org.
Pour repondr a la qhession, deûz mayens :
– Perpozer de cai o eune sentence q’enraye o “faot”… (140 moules ghére de pus -vous pouéz perpozer qhi qe vous veléz)
– Voter e/ou ben dire vôtr rezon su eune defilandée de perpozeries deja ecrites, qhi qi mettra, petit a la fai, les pus populéres, meins etout les sienes les pus mene-trains a remonter.
A savair q’a conter du 1er de novembr, n-i ara pus mayen de perpozer du cai nouviao. Nen poura voter ren qe pour yelles deja envayées.
Eune consulte menée par l’afétûre Make.org
Pour mener la grande consulte en dret-la e mettr les citayens bertons a étr d’un bout den l’afere, la Rejion chouézit de tarvâiller o l’afétûre qi ne tient du tour d’aoqhun e sans pouint de nâche aoqhune make.org. Levée en 2016, yelle-ci q’a ben de la savancetë den l’espression citayene a masse a montrë ben des fais q’o taet capabl pour lever, mener e demeler des projits de méme partout en Urope.
E aprés, qhi qi nen sera fét des aviz e perpozeries-la ?
Aprés la consulte, n-i ara du demelaije de menë par les qenessants de make.org cante les eqhipes de la Rejion pour amarer un fin-conte qi sera, par aprés, partaijë a masse a l’entamâ de 2027. La Rejion promet de ne pouint fere hour su aoqhune perpozerie e de tarvâiller sans qhute-mucerie aoqhune su qhi q’i sera fét de châqe de yelles.
VOUS N-N ÉZ-TI OUI CONTER ?
Pour rasserrer le pus fort de perpozeries q’i se peut, la Rejion met a jouer eune mayanerie de banissaije nouvant !
Eune campagne de banissaije orinale e qi toce
Pour tirer a masse les Bertones e les Bertones a la consulte-la, la Rejion Bertègn a enjinë eune campagne de banissaije populére e rapiettante qe sa banie a eune taolée gouabe e nette bertone : “Tout est bon dans le breton, surtout son opinion”. En s’echalopant des codes du banissaije instiqhuciona, la taolée amene de l’entr-savair o le monde e aïde a ben retiendr le messaije.
O le chouéz-la, invencionouz q’il ét, nen peut perzenter la consulte come l’arivâ de mettr a oui un aviz qi conte de qheuqe chôze e de prindr le si-la : “J’e un aviz su la Bertègn, dede la je peus e je des la partaijer.
Un maçacr de pllan d’ecanderie, o du banissaije su internet e du banissaije du prés
Pour tirer a masse les Bertones e les Bertons a dire lous seqence, le pllan d’ecanderie de la campagne melayera banies den les viles, banissaije su internet e banissaije du prés. De cai qe je velons ét d’aler a la redevance du monde, le pus perchain q’i se peut de l’enret eyou q’i restent, en s’apouyant su les payiz e lous relaes qe châqhun pouraet s’enghimenter, comprindr les ajeûs de la consulte e prindr part a l’afere, chaot pâs eyou qe vous demeuréz. Vaila pourqhi qe la campagne se vayera den les medecineries, den les estacions e diq’a den les privées des cllubes de tèqe-ao-pië. St’aperçue “ao pus perchain de châqhun” a devocion de garanti qe toutes les menieres de monde prenraent part a la consulte-la e q’o seraet d’amain e inclluzive.
A savair qe du 20 du maez d’otobr ao 1er du maez de novembr, des ajissants rejionaos seront perzents su le vilaije de la Route du Rhum a Saint-Mâlo pour parlever le monde a prindr part a la consulte e a repondr és qhessions qi pouraent veni.
Partager :