Triskel, ermine, Gwenn ha du : v’aléz tout savair su les simboles de la Bertègn
17 September 2025
8 minutes de lecture
J’alons decouvri les simboles qi font le bon lôz de nôtr rejion. Vela le pergrame : de l’istouere, de la sonerie, de la mode e eune petite béte chèrnaciere par dessu le brécot… !
Mézë c’ét de fére un arétâ den nôtr tour des payiz de lejende bertons. Je contime don de Saint-Guirec e de ses aghules den le në, des mile segrets ebaobissants de la forét de Paimpont e des mistéres des Monts d’Arée… Mezë, c’ét de caozer des ensegnes e des simboles de la Bertègn.
En pus de son drapiao ben de la qenûe, la Bertègn ét erperzentée par hardi d’aotrs merches filomiqes : le triskel, l’ermine, le riguedaod ou ben core la couéfe bigoudene. Les simboles-la sont ben la prouve d’eune qhulture riche, erdonée long les siecls. Yeûs-ci aïdirent a qe le senti de bertonitë grandije, e qe la fameûzetë du payiz seje erqênue en Bertègn come âillou den le monde. Meins dame, vouz qenesséz-ti l’istouere des simboles-la e d’eyou q’i vienent ?
Le Gwenn ha du, fighure de la filomie bertone
Qhi qi ne qeneût pouint la baniere bertone don ? Eute-late fut chouézie come simbole de la Bertègn a l’Assembllée de l’Assenterie Rejionalist de Bertègn en 1923. Le monde sont vrai lorieûz de la demanier és assembllées, e nen la vaye su bel e ben de codaqes de Bertons de tous les bouts du monde. Gwenn-ha-du ça veût dire gâre nair, e ça q’ét un petit du rabillë de la baniere ameriqhaine.
Ses neu lites naires e bllanches erperzentent les catr payiz de Bâsse-Bertègn e les cinc payiz de Haote-Bertègn. Tant q’és 11 ermines (Pourqhi don onze ? N-i a pâs aoqhun qi set), terjou ét-ti, ça q’ét de vieu qe la petite béte-la ole ét eune fighure de nôtr rejion.
L’ermine, simbole de l’istouère bertone
Puretë morale, ezibletë, injenie e inocence… Vela qhi q’en vaye cant q’en sonje den l’ermine qe son pelaije ét cller bllanc… Pierre de Dreux (1187 – 1250) fut lu le permier q’ajoutit la béte-la su les armouereries a son pere, a vûe le liz françaez. Qheuqes siecls aprés, la lejende conte qe Nanne de Bertègn (1477-1514) léssit eune ermine s’ensaover durant la chace, raport q’ole emaet mieûs se mouri touée o des chains putôt qe de difamer son pai a tracer un enret tout bouillonouz.
Dede la, la sentence de la Bertègn taet forjée : « Kentoc’h mervel eget bezan saotret » (« Putôt se mouri qe d’étr bizouillée »). Sembele pâs-meins qe la sentence-la taet deja de la qenûe du temp du Duc Jean III le Bon (1286 – 1341). qe sti-la taet a chacer su la qhemune de Ghemenë, en Ile-e-Vilaine (Leire-de-Bertègn)[FL1] …
Le triskell, fighure embllematiqe de l’erie celte
Cant q’i sont a vacancer par céz nous, biaocoup de tourists rarivent de Bertègn o un triskel su un pendillon de coû ou ben su un bracelet. Le triskell-la (qi s’orine du berton « trezeg », ét a dire traez qhettes) q’a l’aparessance d’un tourfignon ou ben d’un tourlillon a traez qhettes reûzes. Ét un simbole celtiqe de l’âje du fè. I taet gravë su des dorûres (deja), su la monae, des roches ou ben core des armes etout.
D’après les esplliqes qe n-i a, le triskel ét le simbole du temp a pâsser (pâssë, perzent, aviendr). Meins, il a etout a-revaer o des dieûs tripls, come Brigit q’ét pôyètesse, garissouere e ferrone… De cai q’ét sûr ben sûr terjou : ét d’o la mouvance artistiqe des Seiz Breur, qi nâqhit den l’enter-deûz-gherres, qe le triskel-la pâssit vrai de la qenûe. De st’afére-la, le triskel ét mézë un emblleme conseqent de la Bertègn.
En images
La couéfe bertone, simbole d’un patrimouene de hanes rejionales
Pari qe vous qeneûsséz la recllame d’eune merche françaeze d’agronouri ben de la qenûe qe nen vaye deden traez mâraines couéfëes en bigoudenes qi s’écoqâillent « Pirates ! » ? A l’entamâ du XXe siecl, hardi de fames portaent eune couéfe bigoudene avant qe de les remizae, petit a la fai, den la présse. La couéfe de ceremonie « haote » ét la pus de la qenûe de yelles. Ole ét haote de 30 cm, e va méme diq’a 40 cm a Penmarc’h (Finisterre).
Permier, le mot « bigouden » ça taet le nom du bout apouinti de la couéfe, e pés sti-la pâssit simbole du payiz eyou qe l’abis-la taet portë. A la mode de Wikipédia, 31 % des fames de pus de 47 ans d’âje portaent la bigoudene tous les jous en 1977, tant q’i n-n avaet pus ren q’yeune en 2019… Meins, la couéfe-la ét tout come terjou portée en Bertègn, és grandes fétes e assembllées. Ça q’ét un emblleme core ben vioche de nôtr rejion.
Les riguedaods, patrimouene coutumier de la qhulture bertone
Les riguedaods (« fest-noz » en berton, raport q’i sont de netée) furent de retour en Bertègn den le mitan des anées 1960. Permier, les payizans s’aguerouaent pour les travaos de la ferme, e, dede ‘la, cant qe le bon sair s’erivaet, i chantaent, i fezaent le rond e dansaent, danse qi n’danse, ao son des sonous. Les dansous-la taent pogne a pogne pour erperzenter l’entr-liance sociale.
A l’enter-deûz-gherres i n’taet pus contance des riguedaods. Ça fut Loeiz Ropars, sonou e ensegnou, q’aïdit a qe n-i araet des riguedaods de retour. Yun de yeûs fut le riguedaod des fétes de Cornouailles, parème. Ao jou d’anet, n-i a entr 1650 e 1900 riguedaods e riguejous (yeûs de jou) châqe anée en Bertègn e les assembllées-la sont un brave morcè de la filomie bertone. Ét ben la prouve qe la qhulture bertone, ça q’ét pouint du folklore, pâs !
Qhi qe fèt la Rejion pour la qhulture ?
La Rejion dit vif son voulouèr d’apouyer tout le cai qi poûsse les Bertones e les Bertons a paisser den la vie qhulturale, e qi les aïde a rencontrer les ouvraijes e les artists.
A caoze qe la Bertègn a eune rézille consortive conseqente e vrai alante, o treûe a gagner de la forte citayennerie des Bertons e de lous capabletë a paisser deden d’ensembl. O les avantaijes côrporants-la je pouons apouyer, su toute la Bertègn, eune brave gârerie de projits e d’arivements qhulturaos d’eune sorte e de l’aotr den les demaines de l’espectacl en dret, des arts vûs, du livr e du cinema.
Partager :