Ouest Go : l’emplla de qenchertaije qi vous fèt elijer diq’a 2000€ châqe anée.
30 September 2025
2 minutes de lecture
V’etes pour fére du qenchertaije ou ben v’etes déja a nen fére meins v’etes a aghetter des nouvelles amarées ? Vous qeneûsséz-ti l’emplla Ouest Go ? O la rézille de qenchertaije-la v’aléz pouair terouer des eqhipaijes su des pourcours qe vous fezéz reglèment ou ben qheuqes fais. En pus d’ela, v’aléz pouair elijer de l’arjient, dame !
Minz en jiet en 2018 o les aguerouées de payiz de Bertègn e Payiz-de-la-Leire a sour fin de parlever le qenchertaije du tous-les-jous (lië o des politiqes d’echevissement, de partaijerie e de chârayaije den les terrouérs de la Grande Galerne), OuestGo.fr ét eune rézille de qenchertaije entr-partaijouze.
Eune rouétée de qenchertaije entr-partaijouze su la Grande Galerne
Vous-aotrs etout, v’etes pour fére du qenchertaije ou ben v’etes déja a nen fére meins v’etes tenant a aghetter des nouviaos empllas ou aplliqézons ?Sonjée come eune rézille de qenchertaije o qhi qe les uzaijous sont en biao de lever lous qemunaotë a yeûs, l’emplla OuestGo a la pour li qe vous pouéz mettr vôtr nom en qheuqes tiqes e v’enroler su la qemunaotë de vôtr enterprinze ou de vôtr terrouer, si q’i n-n’a yeune ben sûr :
- Châqhun e châqhune peut mettr son nom su l’emplla-la (les minous ont tout come afére d’un assent de lous monde).
- OuestGo.fr parlève le qenchertaije partaijouz, ét a dire, du qenchertaije pour de ren (pouint d’arjient a bâiller ao menou de la cherte), q’ét ben d’amain permier pour le monde gheûz, les siens q’ont pouint d’ouvraije parème e qi, souventes fais, n’ont pouint de cherte netout.
- Il ét especializë den les pourcours entr la demeurance e le tarvâil, meins i peut servi etout pour d’aotr. N-i a mayen, parème, de qencherter pour des arivements d’eune fai : soneries, federâilles, arivements esportifs.
Ao jou d’anet, n-i a pus de 40 000 jiens d’enrolës su l’emplla-la. Mézë c’ét d’i aler !
Partager :