3mn pour tout savair su la biogârerie en Bertègn
6 May 2025
2 minutes de lecture
L’Ajence Bertone de la Biogârerie (ABB) vient qe de bani eune videyo pedagojiqe pour qe le publliqe perne manqe és ajeûs de la biogârerie en Bertègn. D’amain pour tertout, méme és non-qenéssants, la videyo-la esplliqe pourqhi q’il ét conseqent de pargarder la richesse de la vivrie e coment qe les fezous rejinaos font de lous béte pour empôzer q’o devienraet a ren.
La videyo-la a ça pour yelle d’étr courtaode e ben d’amain e o met don en adorcion des ecosistemes bertons – abordées de mès, bocaijes, rivieres, foréts – e tout le monvéz cai a pezer dessu, come l’artificializézon des terres e le chanjement cllimatiqe. L’ABB conte de retour comben q’il ét métier de pargarder les mitans-la pour teni des ecosistemes ben alivrës e graranti la calitë de la vie és demeurants.
Tertout a paisser deden
Pour ce qi n-n ét de garanti la vivrie, l’Ajence Bertone de la Biogârerie tient ben sa fao den la baterie-la o l’aïde donée és aguerouées de payiz, enterprinzes, consorteries e jirous d’aires naturales. Sa bezaigne : raguerouer tout le cai q’ét fèt, rendr ézibl les partaijes e aïder és siens a mener des projits pour la biogârerie.
La videyo-la, q’ét un afutiao de permiere pour enghimenter le monde e le mettr a paisser deden, prie tertout a s’engaijer a se chevi de cai ecoreponabl, e de revaer qheuqes fezeries, de paisser den des fezeries du payiz ou ben de s’entr-souéter o des fezous de la biogârerie bertone d’otout. O met etout en adorcion les richesses naturales de la Bertègn, les fezeries fezantes pour les pargarder e acouraije les citayens e fezous du payiz a fére de lous béte. Un ajeu de tous q’a afére qe tertout se n-n avizent.
👉Pour n-en savair pus fôt su l’Ajence bertone de la biogârerie : biodiversite.bzh
Partager :