Passer e parlever l’uzaije du galo

Crédit : Franck Betermin

Aprendr e ensegner le galo

La redonézon ét de cai raide consecant pour q’un parlement seje saovë e pargardë. Vaila pourqhi qe j’aïdons a l’ensegnement és ecoles meins etout a la formézon du monde venûs

Le galo és ecoles permieres

Depés berouée, j’aïdons és projits de goûteries de galo pour les ebluçons des ecoles permieres. Ao jou d’anet, la consorterie Cllâssiers tarvâille a fere aqenetr e a evâiller les cours de galo den les ecoles-la en perpozant és ensegnous eune gârerie d’afutiaos pedagojiqes.

Le galo ao colaije e ao licë

Depés berouée n-i a du galo és colaïjes e licës de Bertègn. És colaïjes, ét eune ensegnement de chouéz de la 6e diq’a la 3e. Les liceyen.e.s, tant q’a yeûs, sont den le câs de pousser su le galo come parlement vioche ao chouéz (LV3) den des pâssées entr eune oure e touéz oures de temp châqe semene. Aoterment d’aotr, je baillons des elijes en pus a châqe licë eyou qe n-i a des poussous a sieudr les leçons de galo.

Le galo a la grande-ecole

Den le deden du convenant Grande-ecole/Rejion qi fût signë en 2008, la Grande-ecole de Rene 2 perpoze és poussous, depés l’enretournée 2019, eune UEL galo en ressieudr e en goûterie en parlement obllijë (LV1)

Les leçons e estaijes de galo

Du galo i n-n’a etout âillou q’és ecoles, vaila pourqhi qe j’aïdons és consorteries qi menent des cours du sair e des estaijes de langue, parai come l’Institut du galo ou ben core le Centre Marc Le Bris-CAC-sud 22.

Le galo tous les jous

A sour fin qe le galo treuraet sa nâche d’ertour den la societë d’anet, je tarvâillons en etrarie d’o l’Institut du galo [http://institutdugalo.bzh/fr/accueil/]. Levë en 2017, l’institut-la ét enchaïrjë de mettr a crétr l’ensegnemant, la formézon e le redonézon du galo e de demener la charte “Du galo, dam yan, dam vèr” a sour fin qe le galo seje pus perzent den la societë d’anet. Et li q’amare etout le târvail des afetûres q’ouvraijent pour permouver le galo.Yan meins dame le galo, i n’ a etout âillou q’a l’ecole e qe den la qhulture !

Le galo âillou q’és ecoles

L’ensegnement escolere du galo ét a cretr meins dame le galo ét etout perzent de pus en pus den les laizis. Parème, les restances de vacances qe demene l’UBAPAR perpozent de goûter e de decouvri le galo e la federâille des assembllées galèzes ét, châqe anée, eune arivâ de permiere pour précher e mettr ao haot bout le galo e de toutes les menieres !

Le galo den les medias e la qhulture

Les medias sont un meyen consecant pour q’un parlement seje oui e préchë, vaila pourqhi qe j’aïdons a amarer des donées de galo, permier yelles a la radio Plum FM. De greûs, j’aïdons a la qerouézon en galo den la banisserie, les arts fezants e les eriveries qhulturas, o des pergrames especifiqes e des recllameries de projit.

Un soutien pour les radios en Gallo !

En pratique

Toutes nos banies

Arout'ous a notr lettr de ghiments