Journées uropeyenes du Patrimouene 2025 : la Bertègn en rebaobie les 20 e 21 du maez de setembr
17 September 2025
4 minutes de lecture
Les 3e dârains de setembr, la Bertègn sera su son grand dimanche pour les Journée uropeyenes du Patrimouene. Les 20 e 21 du maez de setembr, des berouées d’empllas qhulturaos, istoriqes e naturaos seront ouverts-francs -e pour qheuqes uns de yeûs, la q’ét ben râle q’i sont ouverts de méme- pour perier le monde d’âje come les garçâilles a rencontrer (d’ertour) toute la richesse du patrimouene berton.
La 42e verdée nacionale-la alôzera le patrimouene coutumier e le patrimouene de l’esport. En Bertègn, i sera pus fôt contance de l’assayaije e de la participézon, o hardi de menieres d’entr-ouvraijeries de pergramées : bâtisserie en terre, orinézons o de la téture, chaces és codaqes ou ben core des afustoriomes de vizites ghidées. De méme, le monde vont pouair véqhi le patrimouene aoterment, ben d’aotr qe d’étr la a regarder, en aïdant a l’erdoner.
En Bertègn, châqe roche, châqe leû su terre ou su la mè, conte eune istouere, ensegne de cai, qe j’ons pllézi d’erdoner és siens qi s’en vienront aprés nous.
Loïg Chesnais-Girard
Le matrimouene ara etout sa pllace, o des fighures fumelines minze en adorcion, fighures qi fut hardi contance de yelles en Bertègn. A Kloar-Karnoed, parème, le monde pouront decouvri l’istouere de Marie Henry e de sa “Buvette du Pouldu” ben de la qenûe, qi taet un enret eyou qe les artistes s’entr-aguerouaent den le bout du XIXe siecl.
Decouvréz les 50 “qheurs en adore” de la Rejion Bertègn !
Châqe anée, le Rejion Bertègn perpôze eune elouterie de 50 animeries pour de ren. Je chouézissons permier les enrets eyou qe n-i a des vrais baçadous, du monde ataïnës, qe les vizitous peuvent caozer d’o yeûs. L’anée-li, le pergame mettra en adorcion, en-méle d’aotrs :
- l’archiverie de l’ôpita de Montroulez, la q’ét vrai râle q’en a le dret d’aler la viziter
- l’afilonjée d’artillerie du Toulinguet a Kraozon, emplla mirlitére estratejiqe,
- la Maison des 13 Lunes a Landerne, un enret vrai misteriouz, e ben d’aotrs core de méme…
La rolée des 50 qheurs en adore !
Ressieudr la cheminerie o “Caozons patrimouene”
Diq’ao 17 du maez d’otobr, le cicl “Caozons patrimouene” perpôze 21 rend’ous en pus (précheries, pourmenées esplliqées” e entr-ouvraijeries de souétië). Qhi qe je vlons o le cicl-la, la q’ét de mettr le monde a vaer pus grand cant q’il ét contance de patrimouene, de conter des ajeûs de sa pagardance e de coment qe le patrimouene joue den le tous les jous des Bertones e des Bertons.
Eune verdée eyou q’il ét contance de l’UNESCO
L’anée-li, les Journées-la seront un petit especiales : i s’eriveront aprés qe les Pieres fries de Karnag e des rives du Morbihan ont të enrolées ao patrimouene mondia de l’UNESCO. L’erqeneûssance enternacionale-la alôze un erie universa, prouve de la richesse qhulturale e istoriqe de la Bertègn. Pour qe pour l’arivement-la seraet marqë d’eune créz su la cheminée, n-i ara puzieurs animeries especiales a Karnag, qe yeune de yelles ét “Mégalithes en fête” (Pierres de frie en rebaobie).
Partager :