Grayûres esportives : la Rejion Bertègn s’enchance den l’amionivetë e l’uzaije de l’esport

O pus de 8 milions de nuros investis en 2024 den des projits de grayûres esportives, la Rejion Bertègn garantit sen engaijement pour qe tertout pouraent fére de l’esport, en laizi ou en competézons de haot-livè. Les investézons-la, evâillées su tout le terrouere, sont pour repondr a deûz ambicions : apouyer l’economie de l’esport e aïder l’entr-viverie en Bertègn.

La perchaine sale d’arivements e d’esport de Qhimpè @Marc Mimram

Den l’encadrûre de la politiqe esportive, la Rejion fèt de sa béte pour garanti pus fôt les condicions pour fére de l’esport su les terroueres, pour acouraijer les projits côrporants e pour qe l’esport pâsseraet apouyâ de parchomance economiqe, de santë publliqe e d’erqenéssance de la Bertègn. Mézë, c’ét de fére la ribotée de catr grayûres apouyées les mouéz pâssës.

Eune grande sale d’arivements a Qhimpè

Elle ét den le mitan de l’aire des montreries de Qhimpè, la perchaine sale des arivements e d’esports recepera des competézons de livè naciona come des arivements qhulturaos e economiqes. Elle ét raféçonabl, menaije la chandelle e poura receper diq’a 4 000 ergardous.

➡️ La Rejion Bertègn apouye le projit ambicinouz-la o une boursée de 3 M€, evâillë su qheuqes anées (800 000 € en 2025, 700 000 € en 2026). Ça q’amene etout eune grayûre miluzaijes pour la Cornouâille, un apouyâ a parlever tout le terrouere.

Tribune ranouvrie a l’estade du Roudourou a Ghingamp

Endret embllematiqe de la tèqe-ao-pië bertone, l’estade du Roudourou ét pour étr ranouvri a sour fin de mettr d’oure e de temp ses tribunes. Ça q’a devocion d’ôfri pus d’éze ao publlic, és etrâriérs e etout qe la grayûre-la seraet core de reng a-vûe le cai qe velent les decidées esportives.

➡️ La Rejion apouye le projit-la o eune boursée de 700 000 € qi forcit l’amionivetë du cllube d’En Avant Guingamp e le garantit, li q’ét ambaçadou de l’esport berton a la grandou nacionale.

Eune aire muxulézon e bone-evive pour le Rugby Club de Vannes

Le Rugby Club de Vannes  li q’ét a s’eblucer ben s’eblucer, a zû un nouviao qheurleû d’apréterie du côrp « Aire Haote-menée e Esport portement », o eune sale de muxulézon, eune aire a s’ercaopi e d’aïde emmedecinée. La selembouézûre-la a ça pour yelle q’è peut emmieuzi coment qe les esportifs s’atrayent e sont ercepës, de domë les ambicions esportives du cllube.

➡️Le projit-la ét apouyë par la Rejion Bertègn, den l’ergardance de voulair forci les duetes de haot livè e la côrporézon des cllubes de métier.

Eune nouvelle cârée pour l’US Concarneau

L’US Concarneau  a roqë diq’ao rolon de métier, dede la ça fut métier de lever eune cârée de tèqe-ao-pië reqenûe. Astoure q’elle ét pour abouter, la nouvelle grayûre-la ôfrira és jouous e a l’eqhipe de menance des condicions de permiere pour jouer ao haot livè e sera en biao de receper des joueries d’ajeu conseqent.
➡️La Rejion bâillit 450 000 € en 2025, a l’about ça q’ét 1,5 M€ de boursée pour tout le projit-la. Les tarvaos seraent pour abouter su le mouéz d’otobr 2025.

Eune politiqe esportive pour tous les terroueres

Les investézons-la treûent vrai vraiment lous chevi den l’estratejie esportive de la Rejion, qi apouye de méme sorte l’emouverie esportive assenterale, olimpiqe e paralimpiqe, les amarous d’arivements esportifs, les esportifs de haot livè e les aguerouées de payiz etout. L’esport ét vû come un apouyâ d’amionivetë, meins etout come de cai q’amene de la santë, de l’eblucerie, de l’inclluzion sociale e de la parchomance su le long du temp.

Pour n-en savair pus fôt su nôtr fezerie

 

Partager :